Hagfelld

Hvað þýðir hagfelld? - Ég er svo rússuð af terpentínu eftir málun í morgun að heilinn á mér neitar að skilja þetta orð.  Er ekki bara verið að segja okkur að við séum í vondum málum og stórskuldug?  Vondu fréttirnar eru klæddar í falleg orð svo maður rjúki ekki bara sísona upp og verði brjálaður.  Annars má ég vera ánægð, seldi málverk í kreppunni í morgun og ég sem er ekki þekktur málari, það kalla ég nú hagfellda gleði! Úps, fattaði allt í einu hvað maðurinn á við, það er þegar hagur landsins fellur - hagkerfisfall.

Hagfelld niðurstaða í augsýn

Spron og Kaupþing

Lífið er eins og hjól þar sem allt snýst í hringi.  Það sama má segja um bankasögu Íslands.  Við erum komin á byrjunarreit aftur.  Nú er bara að bíta á jaxlinn og bíða af sér þennan efnahagsstorm.

SPRON til Kaupþings

Barn fékk að deyja - dóttir mín fékk að deyja

   

   Svo agnarsmá komst þú inn í þennan heim og eins og veikburða fugl hófst þú lífsferð þína.

    Grátur þinn var bergmál úr fjarska sem fjaraði hægt út.

 

   Þú komst of fljótt og ætlaðir ekki að dvelja.  Stormar lífsins blésu í kringum þig áköf og kröftug voru veðrabrigðin í lífi þínu.

   Þú komst sem mikill kennari inn í líf okkar og sameinaðir og þroskaðir sundurtættar sálir.

   Þú talaðir ekki með orðum en blá og  greindarleg augu þín sögðu meira en orð margra spekinga.

   Líkaminn mikið fatlaður en hugurinn hreinn og óflekkaður.

  Þetta varst þú Selma Rún, dóttir mín.

  

   ------------------------------------------------------------------------------------

 

 Við pabbi þinn ákváðum í sameiningu að best værir að þú réðir þessu sjálf (að deyja).

    Ég fór fram og bað um að allar slöngur og nálar yrðu fjarðlægðar og að þú yrðir færð inn á herbergi til okkar.

    Þetta var samþykkt og komið var með þig til okkar.

    Við lögðumst upp í rúm með þig á milli okkar og þar yfirgafst þú mjög friðsældarlega þetta jarðlíf.

    Pabbi þinn tók þig látna í fang sér og gekk með þig um gólf í hinsta sinn.

 

------------------------------------------------------------------------------------------  

 

Ég hjálpaði til við að baða litla kroppinn þinn og klæddi þig í betri föt.  Þú varst friðsæl á svipinn og öll þjáning var horfin.

   Eins og lítil postulínsbrúða lást þú þarna með kertaljós og rósir við dánarbeð þinn.  Föl fegurð þín var ekki af þessum heimi.

 

------------------------------------------------------------------------------------------

 

Það er komið haust og næturnar eru ekki lengur bjartar.  Það haustar í hjarta mínu og mig langar til að taka flugið og fljúga þangað sem þú ert.

  Ég bíð eftir vetrinum til að geta lagst í hýði, gleymt öllu og vaknað aftur að vori til nýs lífs.

   Minningarnar líða framhjá, ég reyni að grípa í myndina af þér og draga þig til baka, en ég gríp í tómt því þú ert farin.

   Það er bara skugginn þinn sem er til staðar.

 

Barn látið deyja samkvæmt dómsúrskurði

Græðgi eða sofandaháttur

Ég veit ekki hvað svona fréttir segja eiginlega.  Var hér einn maður á ferð sem hafði það eitt að markmiði að selja allar ríkiseigur á útsöluverði til þess eins að kallast "kóngur"? - Kaupendur hafa verið ákveðnir og sýnt af sér samningsfrekju og þannig haft kóng og hans ráðgjafa undir.  Ég veit ekki hvar við værum stödd hefðum við haldið áfram að vera lítið land með lítið hagkerfi? Kannski bara með allt fólkið okkar í vinnu og rólegra yfir þjóðarbúinu.

Ég get alveg viðurkennt það að það var gaman að öllum þessum hamagangi.  Hvernig þjóðarremban þandist út og allir gátu veitt sér allt.  Hér og þar um allan bæ nýir jeppar og svart og hvítt skartaði mörg heimili, að ekki sé talandi um allar utanlandsferðirnar og sú sem þessi orð ritar fór reglulega í sín ferðalög.

Ég seldi mitt fyrirtæki á líkum tíma og Landsbankinn var seldur nema ég varð undir í samningsviðræðum og hélt ekki miklu eftir þegar búið var að draga skuldir frá.  Minn stærsti gróði var frelsi frá áhyggjum og græðgisvæðingu í bland við óvinaskap í garð samkeppnisaðila.  Ég var víst ekki með stórt undir mér heldur þybbin kona sem hægt var að ýta til - en mér er nokk sama.  Ánægð í dag í mínum eðlislæga holduga líkama.

Það hafa farið miklir peningar úr landi og nú er það spurningin hversu lengi við erum að ná okkur upp úr öldudalnum.  Er eitthvað á Íslandi sem hægt er að selja fyrir skuldum þjóðarbúsins?

Samson hótaði viðræðuslitum

Voðaverk

Þetta er hræðilegt að lesa og hræðilegt að hugsa til þess að aldar séu upp stéttir manna sem hafa gaman afþví að drepa og veigra sér ekki við að skjóta gamalt fólk og færi, síðan er ekkert tiltökumál að skjóta móður með barna.  Karlmennirnir eru réttdræpir og er þeim ekki eirt.   Til að kóróna þetta allt saman er Guð settur inn í dæmið og er þetta allt gert með hans vilja.  Einkennilegur þessi Guð sem gefur mönnum leyfi til að drepa hvorn annan.

Ísraelar frömdu voðaverk

Tekjutenging

Kerfið er byggt utan um reglur en sjaldnast fólk þó svo að það hjálpi til þegar allt er innan eðlilegra marka.  Um leið og einhver frávik eiga sér stað þá sýnir það sig hversu grimmilegt kerfið getur verið.  Ekkert tillit er tekið aðstæðna fólks, konur sem hafa löngum verið  heima og sinnt börnum og heimili og jafnvel síðar meir fötluðum eða veikum maka þurfa að hypja sig út á götuna þegar makinn fer inn á hjúkrunarheimili.

Þetta minnir mig á þegar ég var rukkuð til baka um umönnunarbætur hálfu ári eftir að fjölfötluð langveik dóttir mín lést, hún dó röngu megin við mánaðarmótin.  Mér var sýndur skilningur að því leiti að beðið var með rukkunina þar til ég var ekki lengur í sorg og skv. kerfinu átti ég að vera komin í lag hálfu ári eftir lát dóttur minnar.  Þessir aurar skiptu mig kannski ekki máli, en mér var hugsað til svipaðra í mínum aðstæðum sem höfðu ekki peninginn til að greiða bæturnar til baka.

Ætli kona Stefáns Schevings þurfi ekki að há grimmilega baráttu til að fá að hafa þó svo væri ekki nema helmingurinn af tekjum Stefáns til að halda áfram að reka þeirra heimili.

Ég segi nú bara, til hvers að safna aurum til elliáranna þegar kerfið rífur þá af manni í formi skatta, hækkunar á heilbrigðiskostnaði og til þess að standa straum af veru á hjúkrunarheimili. 

Eiginkonurnar settar út á götu

Lokatölur

Ein kona í sex efstu sætum.  Sitjandi þingmenn sem halda áfram.  Litlar breytingar.  Ég er ósátt við stöðu kvenna innan Sjálfstæðisflokksins.  Kannski að kjósendur kjósi öðruvísi í komandi kosningum.

Ég veit ekki um hana pólitík!

Illugi sigraði í Reykjavík

Brunaútsala

Nú er svo komið að selja þarf eignir til að standa undir skuldum.  Hvaða fyrirtækjaeigandi þekki þetta ekki sem hefur komist í hann krappan þegar þrengt hefur að í bankakerfinu? -

JÁH er andlitið á bak við Baugsveldið, sá sem tekur á sig öskrin og lætin en það eru mun fleiri sem hafa staðið á bak við hann í sama sukkinu.  Athafnamenn sem skríða meðfram veggjum líkt og Fagin í Oliver Twist, þeir nudda saman höndunum og syngja í kór "I will consider the situation" og hrifsa síðan stuldinn af smáþjófunum.

JÁH er þá að finna á eigin skinni í Megatölum hvað það er að missa allt sitt, en ég á samt von á að það sé til nóg hjá honum.  Ekki að mér sé persónulega illt við manninn enda þekki ég hann ekki og aldrei þefað af hans persónu.  Hann gæti verið hin ágætasta manneskja sem týndi sér í græðginni?

Það er ágætt að eiga Rolls-Royce Phantom á Íslandi en ég held honum sé ekki skemmt að fara rúntinn á honum.  Svona er þetta þegar menn festast í eigin neti.

Ég segi bara, blessi alla sem runnið hafa á rassinn.

Jón Ásgeir selur snekkju og flugvél

Að slá barn

Skrítið að barni skuli gert að víkja þegar fullorðin einstaklingur sem starfar við gæslu leikskólabarna fái að sitja í sínu starfi eftir að hafa ekki einu sinni heldur þrisvar verið uppvís að því að slá barnið utan undir.  Það er ekkert sem réttlætir að opinber starfsmaður lemji barn eða þann sem minnimáttar er, gleymum ekki að aldraðir og öryrkjar búa við ofbeldi af hálfu þeirra sem annast þá. 

Þolandinn víkji en gerandinn situr eftir, skrítin Ella það.  Á barnið eftir að sitja uppi með þá tilfinningu að það sé eitthvað að því þar sem það má lemja það og er síðan flutt til.  Ég held að leikskólayfirvöld verði aðeins að endurskoða þetta tilfelli og gefa ekki fordæmi um að í lagi sé að slá til barna séu þau erfið.

Sló barn utan undir

Smart Kaup

Frábært nafn á lágvöruverslun.  Menn þurfa að vera smart til að starta svona batteríi.  Núna er bara fyrir Sullenberger að ná sér í aur til að hrinda öllu í framkvæmd og getað sparkað Bónusi út í horn! - æi, ég veit það ekki, erum við ekki bara best sett í þessum skítahaug sem við erum nú þegar í? Þarf nokkuð að bæta í hann?

Jón Gerald kynnir Smart Kaup