ofursölustúlka

Þetta er góð frétt í öllu því ljóta sem við lesum dags daglega.  Það mætti vera meira að þessum hugsanargangi hjá þeim sem stýrðu fjármálum og stjórnsýslu landsins, þá hefði lægðin ekki orðið svona mikil.

Ofursölustúlka verðlaunuð

Græðgi

Græðgi er öflug tilfinning sem heltekur þann sem hefur ekki mörk.  Það skiptir engu máli hvort heldur um dóp, áfengi, spilafíkn eða átfíkn sé að ræða.  Græðgi og völd eru máttugar tilfinningar og fylla þann sem þær hafa mikilli vellíðan um stund.  En svo þarf meira og enn meira og enn meira.  Menn svífast einkis til þess að fá dópið sitt.  Fíklar ljúga, stela og pretta.  Gera nánast hvað sem er til þess að ná fram áhrifum sínum. - En það er til endurhæfing.

„Græðgin varð skynseminni yfirsterkari"

Ofurlán

Lagstúfurinn Edelweiss, Edelweiss hljómar í eyrunum á mér. Áráttukenndur textinn breytist yfir í ofurlán, ofurlán.... en svona er þetta, þeir sem geyma aurinn lána sjálfum sér á litlum sem engum vöxtum og löngum afborgunartíma þ.e.a.s. ef það verður nokkurntímann greitt af þessu.

Afhverju í andskotanum var ekki brugðist við fyrr?  Ég segi það nú bara. Hver fréttin af fætur annarri um lánaveitingar eigenda til sjálfs síns.  Við erum ekki að tala um smáaur eins og 10 mkr íbúðarlán.  Neihei, þetta eru tugir milljarða sem hafa verið færðir í eitthvert skattaskjólið.

Verði þessu fólki að góðu.  Það getur örugglega setið að sumbli og sukki og glott út í annað þegar hugur þess reikar að lýðnum heima á Íslandi sem neyðist til að lifa við sult og seyru.  Ég andvarpa nú bara, svei mér þá.

Ég er fegin að ég dró mig í hlé frá fyrirtækjarekstri í lok árs 2002, ég var á góðri leið með að verða spilltur kellingarfjandi.

Eigendur virðast hafa fengið há lán

Lúxusfangelsi

Æi, blessaðans maðurinn að þurfa að dúsa í lúxusíbúð sinni þar til dómari ákveður að hann skuli eyða það sem eftir er ævinnar í öðru lúxusfangelsi.  Menn sem svíkja í tugþúsundum milljarða út úr fyrirtækjum og frá almenningi eru ekki glæpamenn í orðsins fyllstu merkingu.  Þeir eru menn klækja og eignast virðingu margra fyrir kunáttu sína að blekkja. 

Ætli við eigum til slíka snillinga sem mergsjúga alla þá sem þeir koma nálægt?

Madoff hyggst játa sig sekan

Stikkfrí 20%

Nú er ég ekki hagfræðingur, stærðfræðingur eða sérfræðingur um peningamál íslensku þjóðarinnar. 

Auðvitað hugsar maður með sér að 20% lækkun á skuldunum sem við hjónin eigum sé bara hið ágætasta mál, en ég held að það sé skammsýni.  Eins og einhver kommentaraði á þá eru rúmlega 75% þjóðarinnar sem getur staðið undir sínum skuldibindingum núna.

Niðurfærsla mun koma niður á þeim sem minna mega sín þ.e. aldraðir og öryrkjar og barnabörnin okkar síðarmeir.  Ég held því að við verðum að bíta í það súra epli sem okkur stendur til boða núna.  Taka á okkur skellinn og vona að við náum okkur fljótlega upp úr þessari lægð.  Hjálpa þeim sem verst hafa orðið út úr skellinum eins og hægt er.

Við sitjum núna í einhverju feni sem erfitt virðist að komast upp úr, en ég trúi að við getum það.   Látum ekki deigan síga og sláum skjaldborg um hvort annað.  Berum ábyrgð á eigin gjörðum og reynum að horfa ekki of mikið til baka.

Ég er búin að vera fúl og reið lengi, en það dugar ekki til að fleyta mér áfram né held ég nokkrum öðrum. En OK, ég held Framsókn fái ekki mitt atkvæði, til þess þarf aðeins meiri hreinleika frá þeim áður ágætis flokki.

Lífeyrissjóðir ekki stikkfrí

Ólöf greinir frá fjárhagslegum tengslum sínum

Hún er gráðug hún Ólöf og er þess fullviss að þegar vasar hennar fyllast af peningi sem hún getur ávaxtað í stærðargráðu sem er henni óútreiknanleg (m.t.t. lélegrar frammistöðu í stærðfræði), 300milljónir hvorki meira eða minna.  Græðgin er þó bundin við óráðsdrauma, því það eru engar líkur á því að almúgakona með litla sem enga eiginfjárstöðu, atvinnulaus og á góðri leið með að verða heilabiluð, eignist nokkuð meira en sem því nemur að ná að lækka hin stöðugt hækkandi íbúðarlán sem hvíla á eigninni í 104. 

Ég var farin að velta því fyrir mér hvernig ég kæmi öllu gullinu fyrir í kistunni minni þegar ég færi í mína hinstu ferð, því ekki vil ég fara berrössuð og án gulls og gimsteina yfir móðuna miklu.  En nú er svo komið að boxið verður fura og líkami minn settur í sjóðheitan ofn þar sem ég brenn upp líkt og sparifé mitt hefur gert sl. mánuði, og að lokum verð ég að engu líkt og bankareikningur minn.  Ætli ég haldi bara ekki áfram að vera atvinnulaus engill þar efra?

En þeir eru duglegir stjórnmálamennirnir, hver á fætur öðrum að skýra frá fjárhagslegum tengslum sínum, eignum og skuldum. Eigum við að trúa þeim? - Noh, ef þeir hafa pínulítið af mér í sér þá plata þeir pínu pons, svona rétt innan ramma laganna.  Nota hvíta lygi til að koma sér í gegnum nálarauga prófkjörsins og komandi kosninga.

Þegar menn flytja sig yfir í heim pólitíkusunnar verða þeir hálir sem álar, mishreistrugir þó.  Það er hægt að hanga í einum og einum og finna fyrir einhverjum ærleika hjá þeim.

Hef þetta ekki lenga að sinni, þarf að fá mér Otrivin í nef, heilinn er að draga sig í hlé og lokar sig inni þannig að ég þarf að opna nasargöngin svo það lofti smá um minn köflótta pólítíska heila.

Tryggvi Þór: Greinir frá fjárhagslegum tengslum sínum

Lán í óláni

Segi nú ekki annað en á þessum Guðsvolaða flensudegi en að bankarnir sýna af sér djöfullega kænsku.  Þeir lána, fjárfesta, tapa og rukka svo aftur allann pakkkann til baka.  Snild, get ekki annað sagt.  Þetta er eins og að vera komin 200 ár aftur í tímann.

Lánin urðu að óláni

ISG

Ég óska Ingibjörgu góðs bata.  Rétt ákvörðun hjá henni að beina sjónum sínum að því að ná eigin heilsu.  Hálf manneskja getur varla stýrt heilum flokki.  Ingibjörg er kjarnyrt kona og hefur markað sín spor í sögu íslenskra stjórnmála.

Ingibjörg Sólrún hættir

Frelsi

Ég á til rómantískar minningar sem barn um stóran suðupott í kjallaranum undir litla húsinu sem við bjuggum í fyrir vestan.  Þar gat líka á að líta stóran þvottabala, sem um helgar þjónaði sem baðakar handa litlum kroppum, og feikikröftugu þvottabretti.  Þvottadagarnir voru sérstakir og var unun að horfa á hvít lökin blakta í golunni (vindinum er nærri sannleikanum).  Konan í næsta húsi sem hafði umsjón með símstöðinni á staðnum átti rullu og þar fengu konur að setja rúmfötin í gegn svo þau sléttuðust. 

Fyrir okkur krakkana var þvottadagurinn leikur en fyrir unga móður með stóran barnaskara þrældómur.  Að vísu rennir mig minni til að fáeinum árum síðar, rétt áður en við fluttum úr litlja 2ja herbergja húsinu með kjallarann, að keypt hafði verið notuð þvottavél og þar losaði aðeins um vinnuna.

Man ekki til þess að karlmaður kæmi að þvottinum, skúringunum eða hreingerningum, en á þó veika minningu um föður sem stóð við eldavélina og eldaði og vaskaði síðan upp.

Vatikanið? Skil ekki þá stofnun, því þar virðist ríkja gífurleg kvenfyrirlitning meðal kjólklæddra karla sem príða sig með demöntum.  Þeim virðist jafnvel skítsama um litla 9 ára stúlku, sem er nauðgað af stúpföður sínum, verður vanfær af tvíburum, sem hún lætur eyða og hlýtur að launum ásamt hjálparfólki útskúfun Vatíkansins - ég efast um að Guð útskúfi á sama máta og maðurinn -

Minn maður ryksugaði heimilið í dag.  Hann setur í þvottavél og hengir upp.  Varla hægt að segja að hann eldi, en hann gerir sitt besta þó svo kvenremban ég sjái aldrei neitt gott í ryksugun hans því hornin verða útundan.... ég segi nú bara viva la tromla, hennar vegna er ég frjáls, hávaxin með íturvaxinn barm, slétta húð og ævinlega þakklát fyrir heimilistækið sem gaf mér meiri frítíma en áður var.  Bull og vitleysa, það er líka erfitt að setja í þvottavél, sækja úr henni, slá úr brotin og henda upp á snúru, taka niður af snúru, brjóta saman og setja inn í skáp.  Þetta endurtekur sig síðan vikulega allan ársins hring.

Þvottavélin frelsaði konur

Framsókn

Hér sækja konur sig á.  Spyr sjálfa mig hvort menn hefðu þurft að víkja hér á árum áður?  Nú eru að vísu breyttir tíma og jafnræði á að ríkja.  Svo er bara að spyrja að leikslokum.

Siv efst í SV-kjördæmi