Ömurlegt

Hvað við erum spillt og gráðug og ekki virðist það batna eftir því sem ofar dregur menntunar- og stjórnháttarstiginu.  Ég er ekkert að undanskilja sjálfa mig enda refur mikill og dreg á eftir mér þungan syndarpokann.  Stjórnmálaflokkarnir eru engar fyrirmyndir og höfuðsyndirnar hafa synt beint inn í hjörtu manna.  Svo er það undarlegur andskoti hversu auðvelt það er að ljúga og horfa beint í augu manns meðan það er gert.

Skyldi mér einhverntímann batna af syndugum hugsunum og athöfnum.  Ég býð mig fram til næstu kosninga og opna fyrir syndarpokann - ég fengi ekki eitt atkvæði ef ég segði satt frá :-)

Ömurlegar fréttir

Styrkveitingar

Búum við í þjóðfélagi sem byggist á lygum? - Hvar liggur hinn eiginlegi sannleikur og hvað er það sem fær vel menntað fólk í ábyrgðarstöðum til að afsala sér ábyrgð.  Fjölmiðlar koma ákveðnum fréttum áleiðis sem eru svo bornar til baka af þeim sem ábyrgir eru taldir.  Hverjum á að trúa?

Guðlaugur Þór: Ég óskaði ekki eftir styrk

Hálfkák

Það er hálfkák á þessari frétt.  Mætti halda að fréttamanni hefði svelgst á í miðjum skrifum og ákveðið að láta lesendur geta í eyðurnar.

En svona fréttir koma ekki á óvart, tilfæringar af svona tagi eru búnar að eiga sér stað hjá stærri bönkunum líka fyrir og kannski eftir hrun.

Maður er farin að venjast þessari fjármálaflensu og nánast að verða ónæmur.  Ég ætla allavega að njóta þess að vera norður á hjara Íslands um páskana og bið bara um eitt - stjörnubjartan himin.

 

Fyrrum starfsmenn Askar Capital grunaðir um lögbrot

Bankarnir

Þetta eru farnar að verða hættulegar stofnanir þessir bankar.  Þeir fara með innistæður okkar eins og þeir vilja og við erum nauðbeygð til að eiga viðskipti við einhvern þennan. 

Er þörf á fleirum bönkum á Íslandi? - Er ekki bara best að gera heiðarlega banka úr þeim gömlu og laga þar til og bæta síðan við fleiri útibúum þegar heilbrigði er náð?  Bara mínar pælingar, en hvað veit ég svo sem.

Óttast áhlaup á Kaupþing

Fatlaða stúlkan mín

Það er kominn tími til að kveðja þig og halda áfram að lifa.

En minningin um yndislega stúlku mun aldrei hverfa.  Ég mun alltaf minnast þín eins og þú varst.

   Þú varst lítil, fötluð, veik stúlka og þér fylgdu mörg vandamál.

   Vandamálunum gleymi ég ekki og heldur ekki svefnlausu nóttunum, þreytunni og vonleysinu.  Allt þetta var hluti af þinni tilvist.

   Ég hef fyrir framan mig mynd af þér brosandi út að eyrum í sundlauginni, það er ekki að sjá á þessari mynd að þú sért fötluð eða veik, hún sýnir lífsglaða litla stúlku.

   Fyrir þessar minningu er ég þakklát.  Ég er líka þakklát fyrir minninguna um erfiðleikana sem fylgdu þér, því það gerir það auðveldara að sætta sig við brottför þína.

 

Það er svo margt sem ég þarf ekki að reyna lengur með þér.

   Ég þarf ekki að sjá á eftir þér inn á sambýli.

   Ég þarf ekki að hafa áhyggjur af því að farið verði illa með þig og þú misnotuð.

   Ég þarf ekki lengur að hafa áhyggjur af því að þú veikist og verðir fatlaðri.

 

Bless ástin mín og þakka þér fyrir allt.  Ég kveð þig með tárum saknaðar og gleði.

 

--------------------------------------------------------------------------------------

 

Líf mitt og minnar dóttur hefði hún lifað vær óbærilega erfitt því gangan með kerfinu er jafnerfið nú og hún var fyrir 14 árum síðan.  Þau foreldri sem þurfa að berjast fyrir lífsgæðum barns síns og sjálfrar sín eiga samhyggð mína alla.

 

Læknavísindin lengja líf og bjarga þar sem áður var ekki hægt en það er ekki gert ráð fyrir hvernig þessi börn eiga að lifa þegar þau fullorðnast og foreldri orðin vanmáttug að annast þau allan sólarhringinn.  Það er líka sorglegt að sættast við að dauðinn sé líkn þegar um ungt barn er að ræða.  Ég vona svo sannarlega að úrbætur komi fljótlega, en ég er hrædd um að lítið hafi breyst á þeim 14 árum síðan dóttir mín dó.

 

Lokað á langveika stúlku

Svindl

Hvert er samhengið á milli prófsvindls og þessa feita manns?

Í fangelsi fyrir prófsvindl

Séreign

Maður er orðin drulluhrædd um inneign sína í séreignarlífeyrissjóðnum.  Spurnig hvort maður eigi að taka hann út eða treysta áfram þeim sem stýra bönkunum núna?

20.000 sækja sparnaðinn

Vá.....

Enginn Danski meir, engin megrun - bara raskautainnsetning. Pjúff

Heilaaðgerð gegn offitu

Skerðing lífeyris

Ætli lífeyrissparnaður liðinna ára verði ekki uppurinn þegar ég kem til þess að nýta hann?  Sama á örugglega um séreignarlífeyrissparnaðinn.  Allt búið og farið.  Ekki eyði ég ævikvöldinu á heitu Cayman eyjum.

Greiðslur úr 200 þúsund krónum í 180 þúsund

Sjóðir að tæmast

Það setur að manni hrylling að hugsa til þess sem framundan er.  Sjóðir atvinnutryggingasjóðs tæmast um áramót n.k. og þá verða vafalaust enn 15 þúsund manns atvinnulausir.  Íslenska þjóðarbúið er orðið skuldsettara en bankakerfið var áður en það hrundi.  Hvað þýðir það fyrir okkur hinn almenna borgara?  Förum við heil hundrað ár aftur í tímann þegar sultur og seyra herjaði á fólk og lítið var að bíta og brenna.  Ætli við sitjum uppi með aðeins eldri borgara hér þar sem unga fólkið reynir að flýja land til þess að eignast betri framtíð? Sé sú framtíð betri í öðrum löndum þar sem kreppan er að byrja sitt blómstur.

Hverju lofa stjórnmálaflokkarnir núna? Það eru bara þrjár vikur til kosninga.

Tveir milljarðar í bætur