Samson

Samson fór til heljar til að leita og bjarga Dalíu.  Honum tókst ekki ætlunarverk sitt.  Samson mönnum tókst sitt ætlunarverk, að raka til sín féi, koma því úr landi og setja svo allt á hausinn.  Krossa fingur en vona að lífeyrissjóðirnir nái að halda dampi.

Sýndu Samson mikið traust

Menn í vanda

Þótt ég sé engin Gunnars kona þá vil ég samt að allir sitji við sama borð og standi upp og víki komi upp misferli í rekstri LSK eða annarra sjóða.  

Fulltrúar Samfylkingar og Framsóknarflokks verða auðvitað að víkja á meðan á rannsókn stendur, annað býður upp á enn meiri spillingu og fordæmi um að einn má en hinn ekki.  Þessir menn hafa setið saman í bæjarráði og svo í stjórn LSK,  þannig að þeir hafa vitað af hvor  öðrum og ekki ólíklegt að þeir hafi samþykkt bull hvor annarra í kross.

„Og þá erum við í vanda"

Viðskiptasnilld vs Siðblinda

Menn vita alveg hvað þeir eru að gera.  Það er ekki tilviljun að það séu einungis skuldir eftir í Íslenskri afþreyingu ehf.  Við eigum til sérfræðinga sem kunna glufur á löggjöfinni og er ráðgefandi þegar það þarf að bjarga peningum og losna undan skuldum.  Til hamingju með þennan gjörning Íslensk afþreying ehf, nú þarf stjórnin ekki lengur að hafa áhyggjur! Nema einhver annarskonar snillingur geti snúið þessum skiptum við og krafið menn um ábyrgð, sem ég held að verði ekki.

Mér er eiginlega spurn, hvenær taka íslensk stjórnvöld í taumana og láta fara ofan í sauminn á spillingunni.

 Þetta er því miður ekki hægt fyrir íbúðareigendur, veðið liggur í eignum þeirra og þeir sleppa ekki svo auðveldlega ef þeir geta ekki greitt af skuldum sínum.

 Æi, hvað veit ég.... 

Íslensk afþreying gjaldþrota

Bókfærslur

Hver er munurinn á lítilli eða stórri bókhaldsfærslu? - HS hefur færustu menn í sinni þjónustu.  Maðurinn er samt saklaus þar til sekt er sönnuð.

Hannes segist ekki hafa brotið lög

Sjóvá í útrás

Les ég rétt?  Er Sjóvá komið í byggingaframkvæmdir á lúxusíbúðum í Macau úthverfi Hong Kong? - Hvað gengur félaginu til að að ráðast í svona framkvæmdir?  Ætli þeir hafi ekki veðsett hér líka tryggingasjóðinn þar sem bætur eiga að greiðast úr? - Já, ég er eitt spurningarmerki!

Ég borga töluverðar upphæðir (ekki hjá Sjóvá lengur) til þess að standa straum af tryggingum af bíl, hús- og innbústryggingu og ætlast að sjálfsögðu til þess að verði ég fyrir skaða að tryggingafélagið sem ég er tryggð hjá geti bætt mér það tjón. 

Það er allsendis óvíst að Sjóvá geti staðið undir þeim skuldbindingum hér heima.  Félagið hlýtur að vera að komast í þrot og næstu fréttir af því verða vafalaust þær að félagið er orðið eign ríkisins.

Þótt ég sitji hér og skrifi og þykist hafa einhverjar skoðanir þá hef ég ekki glóru um hvað er í raun í gangi, er ekki innanbúðar koppur þarna, en ég les það sem stendur í fréttablöðum og heyri og sé það sem sagt er í út- og sjónvarpi.  

Ótrúlegt að þessi fámenna þjóð skuli hafa getað skotist svona hratt upp á stjörnuhimininn till þess eins að hrapa og verða að fjármálalegu ruslara lýðveldi.  Hvaða snillingar smíðuðu hagkerfi okkar og útrás?  Engir apar eða vitleysingar.  Að baki liggur margra ára nám verk- , lög- og stærðfræðinga í bland við áhættusækna fíkla sem hafa tröllriðið eða má bara ekki segja tröllskessunauðgað íslensku hagkerfi.  

Það segir mér hugur að menn hafi enga iðrun, að þeir sjái ekkert athugavert við framkvæmd sína í álíka málum.  Menn þvo bara hendur sínar og benda á einhvern annan til að krossfesta.  Það liggur við að ég haldi að Pilatus sé endurfæddur aftur og núna er það almenningur sem er húðhýddur og krossfestur saklaus (flestir, en þó ekki allir).

Mér er svosem ekkert vel við þegar upp um mig kemst þegar ég geng á skjön við almennt velsæmi en sætti mig þó við að þegar ég í "sakleysi" mínu hef gengið á rétt annara að tekið sé í hnakkadrambið á mér og ég látin bæta fyrir brot mín.  Aðeins þannig á ég von á að eignast uppreisn æru.  Ég á nógu erfitt að drattast með það sem ég hef nú þegar á samviskunni og er enn óbætt.  Það er nefninlega svo að ég er mannleg og breysk og er ekki viss hvað ég gerði hefði ég aðgengi að féi og valdi - siðleysið gæti búið í mér og sagt mér að allt sem ég snerti og gerði væri í lagi, svo myndi ég bara loka augunum og sjá ekki þann skaða sem ég hef valdið.  Flúið til útlanda (landfræðilegur flótti fíkilsins) og lifað í glerturni.... en það er eitthvað í mér sem stoppar þegar ég er komin að endabrú græðginnar, smá samviska sem hvíslar að mér að það sem ég geri öðrum muni henda mig um síðir.  Það sem fer upp kemur niður að lokum.

Sjóvá tapar 3,2 milljörðum í Hong Kong

Hindrunarhlaup

Svei mér þá ef ríkisbubbar séu ekki orðnir íþróttafólk, það er allavega nægilega mikið um hrindranahlaup.

Nýjar hindranir á veginum

Stuðningur

Ég vissi ekki að þessir menn hefðu setið í ríkisstjórn á síðasta ári.  Voru þeir kannski huldumenn þar og stýrðu landinu úr bankaturni? - Jahérna, held ég þurfi áfallahjálp

Lofuðu aldrei Icesave-ábyrgð

Áfall

Ég var í gærkveldi að keyra austur í sveit með vinkonu minni.  Dóttir hennar var að útskrifast úr grunnskóla og kominn í þann skóla sem hana langaði til, FB, móðirin himinlifandi yfir því að stelpan færi í þann skóla sem hana langaði til.  Bróðir hennar hafði farið í Verzló og systirin í MS.  Vinkona mín er vel menntuð, maðurinn hennar hrl.  - ekkert snobb í gangi, bara ánægja yfir því að barnið vildi halda áfram að ganga sinn menntaveg.

Ég var A nemandi í Landsprófi en útlitð var þannig á mínum ungdómsárum að fyrir flesta var það ekki inn í myndinni að komast í menntaskóla, bæði vegna fjarlægðar og svo vegna fjárhags heimilinna.  Ég get svo svarið það að ég hef ekki enn náð mér yfir þá höfnun sem helltist yfir mig um mitt skólaár þegar það kýldist inn í mig að ég ætti ekki langskólanám fyrir höndum.  Ég grét og grét og svo fór ég á fyllerí.... síðan gerðist sagan endalausa.

Maður hreinlega kemst ekkert áfram í lífinu nema að geta tekið höfnun og það á ekkert að undanskilja börn eða unglinga  frá því að læra að takast á við að það fái ekki allt sem það vilji.  Þar kemur til skjalanna uppeldi/kennsla sem á sér stað heimafyrir.... að sjálfsögðu vill maður fylgja vinum sínum þegar skipt er um skóla, en þessi tímamót er líka þau þar sem greiðist úr vinahópnum og nýir koma í staðinn og það getur bara hreinlega verið gleðileg og farsæl breyting.

Ég er ekki MRingur, eða Verzlóingur... er FB öldungur, sá ekki annað en að flestir kennarar (sat með krökkunum í tíma) hefðu metnað fyrir hönd nemenda sinna og reyndu hvað þeir gátu að hvetja þau áfram.

Kæra móðir, hjálpaðu stelpunni þinni að vera stolt af því að hafa náð góðum árangri.  Að hún hafi yfir höfuð tækifæri á því að ganga menntaveginn.  Að hún búi svo vel að eiga móður sem vill henni allt hið besta.  Hjálpaðu henni að æfa sig undir þau áföll og hafnanir sem hver og ein manneskja þarf að ganga í gegnum á sínum lífsferli.  Því fyrr sem maður fer að æfa sig því auðveldari verður ganga lífsins.  - 

Foreldrar bálreiðir

F...

Þá er bara að ganga meira og nota strætó.  Býst ekki við að Olíuverslunin hlusti á mitt ámátlega kall um að ég hafi ekki efni á því að borga dropann svona dýru verði. 

Spurning hvort heimilin þoli allar þessar hækkanir?  Hvar eru loforðin sem voru gefin um að halda skjaldborg utanum þau? - Blessaðir séu þeir sem aurunum ráða.

Bensín hækkar um 12,50 krónur

Duga ekki

Mér leiðist þegar ég er í svartsýnu skapi, en það er orðin venjan núorðið að taka frekar neikvæðan (raunsæan) pól í hæðina. 

Hvað eru menn að hugsa þegar þeir halda að eignir Landsbankans dugi fyrir Icesave reikningnum? Það er kreppa út í heimi, við erum næstum komin í ruslhóp hvað varðar lánshæfismat landsins, svo það er nær lagi að þessar eignir rýrni enn frekar og við í enn dýpri skít en nú er.  

Það tekur alltaf tíma að leiða sannleikann í ljós, menn reyna hvað þeir geta að krota yfir mistökin og afleiðingarnar af þeim og leiða blindan her af sérfræðingum sem eiga að slá ryki í augum almennings.

Ég hef enga lausn nema að íslendingar verði leiddir í sannleikann um það sem er í gangi.  Það er ágætt að búa sig undir kreppu og vera viðbúinn þegar hún skellur á, það þekki ég af eigin raun eftir að ég missti vinnuna.  Einhvern veginn vissi ég hvað var í vændum.

Ég þori ekki að hugsa þá hugsun til enda hvað gerist ef við verðum gjaldþrota þjóð?

 

Eignir duga ekki fyrir Icesave